श्री बजरंग बाण

॥ दोहा ॥
निश्चय प्रेम प्रतीत ते,
विनय करें सनमान।
तेहि के कारज सकल शुभ,
सिद्ध करें हनुमान॥

जय हनुमन्त सन्त हितकारी।
सुनि लीजै प्रभु अरज हमारी॥

जनके काज विलम्ब न कीजै।
आतुर दौरि महा सुख दीजै॥

जैसे कूदि सिन्धु महि पारा।
सुरसा बदन पैठि बिस्तारा॥

आगे जाइ लंकिनी रोका।
मारेहु लात गई सुर लोका॥

जाय विभीषण को सुख दीन्हा।
सीता निरखि परमपद लीन्हा॥

बाग उजारि सिन्धु महँ बोरा।
अति आतुर यमकातर तोरा॥

अक्षय कुमार को मारि संहारा।
लूम लपेटि लंक को जारा॥

लाह समान लंक जरि गई।
जय-जय धुनि सुर पुर महँ भई॥

अब विलम्ब केहि कारन स्वामी।
कृपा करहु उर अन्तर्यामी॥

जय-जय लक्ष्मण प्राण के दाता।
आतुर होइ दुख करहु निपाता॥

जय गिरिधर जय-जय सुखसागर
सुर - समूह समरथ भट नागर॥

ॐ हनु-हनु-हनु हनुमंत हठीले।
बैरिहिं मारु वज्र की कीले॥

गदा वज्र लै बैरिहिं मारो।
महाराज प्रभु दास उबारो॥

ॐकार हुँकार महाबीर धावो।
वज्र गदा हनु बिलम्ब न लावो॥

ॐ ङ्गीं ङ्गीं ङ्गीं हनुमंत कपीसा।
ॐ हुँ हुँ हुँ हनि अरि उर शीशा॥

सत्य होउ हरि शपथ पायके।
राम दूत धरु मारु जायके॥

जय-जय-जय हनुमंत अगाधा।
दुख पावत जन केहि अपराधा॥

पूजा जप तप नेम अचारा।
नहिं जानत हौं दास तुम्हारा॥

वन-उपवन मग गिरिगृह माहीं।
तुम्हरे बल हम डरपत नाहीं॥

पाँय परौं कर जोरि मनावौं।
यहि अवसर अब केहि गोहरावौं॥

जय अंजनि कुमार बलवन्ता।
शंकर सुवन वीर हनुमन्ता॥

बदन कराल काल कुल घालक।
राम सहाय सदा प्रति पालक॥

भूत प्रेत पिशाच निशाचर।
अग्नि बैताल काल मारीमर॥

इन्हें मारु तोहिं शपथ राम की।
राखु नाथ मरजाद नाम की॥

जनक सुता हरिदास कहावो।
ताकी सपथ विलम्ब न लावो॥

जय-जय-जय धुनि होत अकाशा।
सुमिरत होत दुसह दुख नाशा॥

चरण-पकड़ कर जोरि मनावौं।
यहि अवसर अब केहि गोहरावौं॥

उठु-उठु चलु तोहिं राम दुहाई।
पाँय परौं कर जोरि मनाई॥

ॐ चंचं चंचं चपल चलन्ता।
ॐ हनु हनु हनु हनु हनुमंता॥

ॐ हं हं हाँक देत कपि चंचल।
ॐ सं सं सहमि पराने खलदल॥

अपने जन को तुरत उबारो।
सुमिरत होय आनन्द हमारो॥

यह बजरंग बाण जेहि मारे।
ताहि कहो फिर कौन उबारे॥

पाठ करे बजरंग बाण की।
हनुमत रक्षा करें प्राण की॥

यह बजरंग बाण जो जापै।
तेहि ते भूत प्रेत सब काँपै॥

धूप देय अरु जपै हमेशा।
ताके तन नहिं रहे कलेशा॥

॥ दोहा ॥
प्रेम प्रतीतिहि कपि भजै,
सदा धरै उर ध्यान।
तेहि के कारज सकल शुभ,
सिद्ध करै हनुमान॥