श्री बलराम चालीसा

॥ दोहा ॥
विपति हरन मंगल करन,
सारत जन के काज।
जयति जयति जय जयति जय,
श्री दाऊजी महाराज॥

॥ चौपाई ॥
जय बलभद्र शेष अवतारी।
दीनदयाल भक्त हितकारी॥

शेष रूप धारौ महि भारा।
सन्तन हेतु लीन्ह अवतारा॥

रोहिणी उदर जन्म प्रभु लीन्हों।
नन्द यशोदा कों सुख दीन्हों॥

जय वसुदेव रोहिनी नन्दन।
जय यदुकुल चंदन जगवंदन॥

गौर वर्ण तन गिरा गंभीरा।
सर सोहे पचरंगी चीरा॥

नीलाम्बर तन लखत सुहावन।
भाल तिलक त्रिय ताप नसावन॥

भ्रकुटी कुटिल नैन रतनारे।
कुन्डल श्रवन लसत मतवारे॥

ठोढ़ी पै हीरा द्युतिकारी।
कोमल कर हल मूसल धारी॥

नितनव साज सजत छवि छाजै।
सेवा में श्री रेवती विराजै॥

सुघर क्षीर सागर तट धामा।
चरित करत नव लोक ललामा॥

माखन मिसरी भोग तिहारौ।
सदा नाथ संतन पन पारौ॥

बालचरित कीन्हे सुखकारी।
मोहि लये व्रज के नर-नारी॥

धेनक असुर खेल करि मारयो।
महाबली प्रलम्ब संहारयो॥

धनुष यज्ञ जब कंस रचायो।
कृष्ण सहित तब तुमहि बुलायो॥

मुष्टिक मल्ह महा गरवीला।
ताहि पछारि करी शिशुलीला॥

जरासिन्धु जब लड़ी लराई।
बाँध लयो तुमने बलदाई॥

गदा युद्ध के तुम आचारी।
प्रभुता जग विख्यात तिहारी॥

दुर्योधन कीन्हो दुर्वादा।
भयो तुमहि अति क्रोध विषादा॥

तब सकोप हल हाथ उठायो।
हल सो गजपुर को उकसायो॥

नगर हस्तिनापुर सब डोला।
कुरुपति विनय सहित तब बोला॥

साम्ब ब्याहि द्वारावति आये।
यदुबंशन आनंद मनाये॥

जानी सुत ऋषि मन अभिमाना।
कुश धरि शीश लये हरि प्राना॥

वैशम्पायन को वर दीयो।
चित्त प्रसन्न ऋषिन को कीयो॥

हन्यो द्विविद बानर बलधारी।
ऋषि मुनि सुर सब किये सुखारी॥

जेहि को कृपा कटाक्ष निहारौ।
भरे सकल सुख को भंडारौ॥

ध्यावै तुमहि सहित विश्वासा।
ताकी होय पूर्ण सब आशा॥

दुर्लभ वस्तु जगत में जोई।
सुमिरत तुमहिं सुलभ सो होई॥

प्रेम सहित जो ध्यान लगावै।
गौधन धन मन मानो पावै॥

कृषक भजे तुमको चितलाई।
उपजे खेत अन्न अधिकाई॥

कोढ़िन की करि कंचन काया।
निर्धन भवन भरत तुम माया॥

पावैं बाँझ नारि सुत नीको।
तुम सम कौन सहाय दुःखी को॥

जन प्रति पालक संत सहायक।
शक्तिमान समरथ सब लायक॥

निर्बल के बलराम कहावौ।
जन पुकार सुनि आतुर धावौ॥

तुम अनंत प्रभु अन्तर्यामी।
वेगि हरहु मम संकट स्वामी॥

हौं बालक विमूढ़ मति मंदा।
काटहु नाथ भरम भवफंदा॥

जैसे भक्त अनेक उबारे।
तैसेहि सारो काज हमारे॥

देव दयालु न आपु समाना।
जग में हीन न मो सम आना॥

दाऊदयाल ब्रज के राजा।
हो दयाल अब सारौ काजा॥

सेवक विनय करै कर जोरे।
पुरवहु नाथ मनोरथ मोरे॥

मौपै करहु प्रेम परतीती।
देउ भक्ति भक्तन की प्रीती॥

॥ दोहा ॥
यह चालीसा जो पढ़े,
चित पवित्र सतवार।
पावै परम “विचित्र” वह,
सम्पत्ति सुख अपार॥