श्री बलदेवाष्टक

॥ बलदेवाष्टक ॥
काँप उठी दुख में वसुधा,
जब पाप कौ भार बढ़्यौ अति भारो।
भार अपार उतारन को,
सहसानन ने नर को तन धारौ॥
रोहिनी औ वसुदेव के पुत्र,
कियो तुम गोकुल गाम सुखारो।
कौन बखान सकै जग में,
बलदेव विचित्र चरित्र तिहारौ॥१॥

नंद जसोमति को सुखदे,
ब्रजबासिन के उर प्रेम प्रचारौ।
रास रचाय कियो परिहास,
सदा निज भक्तन को पन पारौ॥
बाल सखान में खेल रचाय के,
धेनुका मारि धरा पर डारौ।
कौन बखान सकै जग में,
बलदेव विचित्र चरित्र तिहारौ॥२॥

मारन हेतु प्रलम्ब तुम्हें,
निज रूप बनाय के ग्वाल को न्यारी।
बाल सखान के साथ में भेद छिपाय के,
खेलन खेल सिधारौ॥
पीठ चढ़ाय के भागो तुम्हें,
निज बोझ के भार से दाबिके मारौ।
कौन बखान सकै जग में,
बलदेव विचित्र चरित्र तिहारौ॥३॥

मुष्टिक मल्ल बुलाय के,
कंस ने आपस में मिल मंत्र विचारौ।
बाँध लंगोट अखाड़े में आय,
फिराय लंगोट जवै किलकारौ॥
जाय अखाड़े में कूदि पड़े तुम,
मुष्टिक चाणूर मारि संहारौ।
कौन बखान सकै जग में,
बलदेव विचित्र चरित्र तिहारौ॥४॥

मारि अनेकन दुष्टन के दल,
भूतल भार अपार उतारौ।
दै सुख गौ-द्विज-देवन को,
मुनि-संतन के सब संकट टारौ॥
फूलन की वरसा वरसाय,
कियो सब देवन ने तेरो जयकारो।
कौन बखान सकै जग में,
बलदेव विचित्र चरित्र तिहारौ॥५॥

टेर सुनी न अवेर करी,
निज भक्तन को सब कारज सारौ।
पाप पहार को छार करौ,
भय भूरि हरौ भव पार उतारौ॥
कोर कृपा की निहारत ही,
विनसावत कष्ट कठोर करारौ।
कौन बखान सकै जग में,
बलदेव विचित्र चरित्र तिहारौ॥६॥

ज्ञान प्रकाश करौ उर माहि,
विनाश करौ चित को अंधियारौ।
मोह हरौ मद क्रोध हरौ,
अरु काम को लोभ को नाम पजारौ॥
नाथ अनाथन के तुम हौ,
धरि हाथ कृपा कौ अनाथ सुधारौ।
कौन बखान सकै जग में,
बलदेव विचित्र चरित्र तिहारौ॥७॥

दास करे अरदास प्रभू,
मझधार में आय फस्यौ अपु ढारौ।
डूबत आज जहाज मेरो,
नाहि दीख परै दुख माहि किनारौ॥
हाथ तेरे पतवार दई,
अब नाथ तुही इक खेवन वारौ।
कौन बखान सकै जग में,
बलदेव विचित्र चरित्र तिहारौ॥८॥