श्री महिषासुर मर्दिनी स्तोत्रम्

॥ श्री महिषासुरमर्दिनी स्तोत्रम् ॥
अयि गिरिनन्दिनि नन्दितमेदिनि
विश्वविनोदिनि नन्दनुते,
गिरिवरविन्ध्यशिरोधिनिवासिनि
विष्णुविलासिनि जिष्णुनुते।
भगवति हे शितिकण्ठकुटुम्बिनि
भूरिकुटुम्बिनि भूरिकृते,
जय जय हे महिषासुरमर्दिनि
रम्यकपर्दिनि शैलसुते॥१॥

सुरवरवर्षिणि दुर्धरधर्षिणि
दुर्मुखमर्षिणि हर्षरते,
त्रिभुवनपोषिणि शंकरतोषिणि
किल्विषमोषिणि घोषरते।
दनुजनिरोषिणि दितिसुतरोषिणि
दुर्मदशोषिणि सिंधुसुते,
जय जय हे महिषासुरमर्दिनि
रम्यकपर्दिनि शैलसुते॥२॥

अयि जगदम्ब मदम्ब
कदम्बवनप्रियवासिनि हासरते,
शिखरिशिरोमणि तुंगहिमालय
श्रृंगनिजालयमध्यगते।
मधुमधुरे मधुकैटभगंजिनि
कैटभभंजिनि रासरते,
जय जय हे महिषासुरमर्दिनि
रम्यकपर्दिनि शैलसुते॥३॥

अयि शतखण्डविखण्डित
रूण्डवितुण्डित शुण्डगजाधिपते,
रिपुगजगण्डविदारण चण्ड
पराक्रम शुण्डमृगाधिपते।
निजभुज दण्डनिपातित
खण्डविपातित मुण्डभटाधिपते,
जय जय हे महिषासुरमर्दिनि
रम्यकपर्दिनि शैलसुते॥४॥

अयि रणदुर्मद शत्रुवधोदित
दुर्धरनिर्जर शक्तिभृते,
चतुरविचार धुरीणमहाशिव
दूतकृतप्रमथाधिपते।
दुरित दुरीहदुराशय दुर्मति
दानवदूतकृतान्तमते,
जय जय हे महिषासुरमर्दिनि
रम्यकपर्दिनि शैलसुते॥५॥

अयि शरणागतवैरिवधू
वरवीरवराभय दायिकरे,
त्रिभुवन मस्तकशूलविरोधि
शिरोधिकृतामल शूलकरे।
दुमिदुमितामरदुंदुभिनाद
महो मुखरीकृत तिग्मकरे,
जय जय हे महिषासुरमर्दिनि
रम्यकपर्दिनि शैलसुते॥६॥

अयि निज हुंकृतिमात्र निराकृत
धूम्र विलोचन धूम्रशते,
समर विशोषितशोणित
बीजसमुद्भवशोणित बीजलते।
शिव शिव शुम्भनिशुम्भमहाहव
तर्पित भूतपिशाचरते,
जय जय हे महिषासुरमर्दिनि
रम्यकपर्दिनि शैलसुते॥७॥

धनुरनुसंग रणक्षणसंग
परिस्फुरदंग नटत्कटके,
कनकपिशंग पृषत्कनिषंग
रसद्भटश्रृंग हताबटुके।
कृतचतुरंग बलक्षितिरंग
घटद्बहुरंग रटद्बटुके,
जय जय हे महिषासुरमर्दिनि
रम्यकपर्दिनि शैलसुते॥८॥

सुरललना ततथेयि तथेयि
कृताभिनयोदर नृत्यरते,
कृत कुकुथः कुकुथो
गडदादिकताल कुतूहल गानरते।
धुधुकुट धुक्कुट धिन्धिमित
ध्वनि धीर मृदङ्ग निनादरते,
जय जय हे महिषासुरमर्दिनि
रम्यकपर्दिनि शैलसुते॥९॥
जय जय जप्यजये जय
शब्दपरस्तुति तत्परविश्वनुते,
झण झण झिं झिं झिंकृतनूपुर
सिंजित मोहितभूतपते।
नटित नटार्धनटीनट नायक
नाटित नाट्यसुगानरते,
जय जय हे महिषासुरमर्दिनि
रम्यकपर्दिनि शैलसुते॥१०॥
अयि सुमनः सुमनः सुमनः
सुमनः सुमनोहर कान्तियुते,
श्रित रजनी रजनी रजनी
रजनी रजनीकर वक्त्रवृते।
सुनयन वि भ्रमर भ्रमर भ्रमर
भ्रमर भ्रमराधिपते,
जय जय हे महिषासुरमर्दिनि
रम्यकपर्दिनि शैलसुते॥११॥

सहित महाहव मल्ल मतल्लि
कमल्लि तरल्ल कमल्लरते,
विरचित वल्लि कपल्लि कमल्लि
कभिल्लि कभिल्लि कवर्गवृते।
सितकृत पुल्लसमुल्लसितारुण
तल्लजपल्लव सल्ललिते,
जय जय हे महिषासुरमर्दिनि
रम्यकपर्दिनि शैलसुते॥१२॥
अविरल गण्ड़गलन्मदमेदुर
मत्त मतंगजराजपते,
त्रिभुवनभूषणभूतकलानिधि
रूपपयोनिधि राजसुते।
अयि सुदतीजनलालसमान
समोहनमन्मथ राजसुते,
जय जय हे महिषासुरमर्दिनि
रम्यकपर्दिनि शैलसुते॥१३॥

कमलदलामल कोमलकान्ति
कला कलिता मल भाललते,
सकल विलास कलानिलयक्रम
केलिचलत्कलहंसकुले।
अलिकुलसंकुलकुवलयमण्डल
मौलिमिलद्दकुलालिकुले,
जय जय हे महिषासुरमर्दिनि
रम्यकपर्दिनि शैलसुते॥१४॥

करमुरलीरववीजितकूजित
लज्जितकोकिलमंजुमते,
मिलितपुलिन्दमनोहरगुंजित
रंजितशैलनिकुंजगते।
निजगणभूतमहाशबरीगण
सद्‌गुणसंभृतकेलितले,
जय जय हे महिषासुरमर्दिनि
रम्यकपर्दिनि शैलसुते॥१५॥

कटितटपीतदुकूलविचित्र
मयूखतिरस्कृतचन्द्ररूचे,
प्रणत सुरासुरमौलिमणिस्फुर
दंशुल सन्नख चन्द्ररूचे।
जितकनकाचलमौलिपदोर्जित
निर्भर कुंजर कुंभकुचे,
जय जय हे महिषासुरमर्दिनि
रम्यकपर्दिनि शैलसुते॥१६॥

विजित सहस्रकरैकसहस्र
करैकसहस्रकरैकनुते,
कृतसुरतारकसंगरतारक
संगरतारकसूनुसुते।
सुरथसमाधिसमानसमाधि
समानसमाधि सुजातरते,
जय जय हे महिषासुरमर्दिनि
रम्यकपर्दिनि शैलसुते॥१७॥

पदकमलं करूणानिलये
वरिवस्यति योऽनुदिनं सु शिवे,
अयि कमले कमलानिलये
कमलानिलयः स कथं न भवेत्
।तव पदमेव परंपदमित्य
नुशीलयतो मम किं न शिवे,
जय जय हे महिषासुरमर्दिनि
रम्यकपर्दिनि शैलसुते॥१८॥

कनकलसत्कल सिन्धुजलैरनु
सिंचिनुतेगुण रंगभुवं,
भजति स किं न शचीकुचकुम्भ
तटीपरिरंभसुखानुभवम्।
तवचरणं शरणं करवाणि
नतामरवाणि निवासि शिवं,
जय जय हे महिषासुरमर्दिनि
रम्यकपर्दिनि शैलसुते॥१९॥

तव विमलेन्दु कुलं वदनेन्दुमलं
सकलं ननु कूलयते,
किमु पूरुहूत पुरीन्दुमुखी
सुमुखीभिरसौ विमुखी क्रियते।
मम तु मतं शिवनाम धने
भवती कृपया किमतु क्रियते,
जय जय हे महिषासुरमर्दिनि
रम्यकपर्दिनि शैलसुते॥२०॥

अयि मयि दीनदयालुतया
कृपयैव त्वया भवितव्यमुमे,
अयि जगतो जननी कृपयासि
यथासि तथाऽनुमितासिरते।
यदुचितमत्र भवत्युररी
कुरुतादुरुतापमपाकुरुते,
जय जय हे महिषासुरमर्दिनि
रम्यकपर्दिनि शैलसुते॥२१॥